ಪೆದ್ದಿ ನಾನು

ನಾನು ಬರೆಯಬೇಕು

ಪದಗಳನ್ನು ಹೆಕ್ಕಿ ತೆಗಿಯಬೇಕು

ಅಯ್ಯೋ!ಏನು ಬರೆಯಲಿ?

ಹೂವು  ಗಾಳಿ  ಹಕ್ಕಿ

ಬೆಟ್ಟ ಮಣ್ಣು........

ಅಯ್ಯೋ! ಬೇಡ. ಎಲ್ಲರೂ

ಬರೆದು ಪದಗಳೇ ಉಳಿದಿಲ್ಲ  ನನಗೆ

ಗಂಡ  ಮಗು ಅಜ್ಜಿ

ಮಾವ ಸಂಬಂಧಿಕರು.....

ಅಯ್ಯೋ! ಬೇಡ.ಅವರನ್ನು

ಪದಗಳಲ್ಲಿ ಹೆರಲು ಮನಸ್ಸಿಲ್ಲ ನನಗೆ

ಸಾವು  ಸುಖ ಮರಣ

ಆನಂದ ನೋವು........

ಅಯ್ಯೋ! ಬೇಡ .ಅವುಗಳನ್ನು

ಪದಗಳಲ್ಲಿ ಹೊರಲು ಶಕ್ತಿಯಿಲ್ಲ ನನಗೆ

ರಾಜಕೀಯ  ಸಮಾಜ  ಹೋರಾಟ

ಭ್ರಷ್ಟಾಚಾರ ಸಿನಿಮಾ.........

ಅಯ್ಯೋ!ಬೇಡ.ಅವುಗಳನ್ನು 

ಪದಗಳಲ್ಲಿ ಜೋಡಿಸುವ ಜ್ಞಾನವಿಲ್ಲ ನನಗೆ

ಪೆದ್ದಿ ನಾನು

ಬರೆಯಲು ಪದಗಳೇ ಸಿಗುತ್ತಿಲ್ಲ.

ಪೆದ್ದಿ ನಾನು.

                   -  ಕೂಡಕಂಡಿ  ಪ್ರೀತು ರಾಜೀವ್.